Сер Алекс Фергюсон 2018-йилда миясига қон қуйилганидан кейин илк бор "Олд Траффорд"га қайтган кунини эслади. Шошилинч оператсиядан тўрт ой ўтиб, у "Манчестер Юнайтед"нинг "Вулверҳемптон"га қарши ўйинини томоша қилиш учун стадионга борган.
"Ўзимни хотиржам ҳис қилдим, деб айтишни истардим. Аммо ундай бўлмаган. Мен қўрқиб кетгандим", — деди Фергюсон.
Аммо мухлислар уни тик турган ҳолда қарсаклар билан кутиб олди. Фергюсонинг рафиқаси Кети ҳатто йиғлаб юборишига сал қолганини айтди.
Ўша пайтда Фергюсон "Манчестер Юнайтед"даги 26 йиллик фаолиятини якунлаганига беш йил бўлган эди. У клуб билан 38 та совринни қўлга киритган, жумладан 13 та АПЛ чемпионлиги ва 2 та Чемпионлар лигаси ғолиблигини қайд этган.
Фергюсон миясига қон қуйилганидан кейин бир муддат гапира олмаганини ҳам эслади. Мутахассислар унга турли сўзларни ёздириш орқали нутқини қайта тиклашга ёрдам берган.
Фергюсон 1963-йилдаги "Рейнжерс"га қарши ўйинни ҳам эслади. 21 ёшли футболчи ўша баҳсда хет-трик қайд этган ва бу унинг фаолиятида бурилиш нуқтаси бўлган.
"Ёшларга шуни айтган бўлардим: ҳаётингиздаги энг катта имкониятни қўлдан бой берманг. Энг муҳими — уни вақтида таниб олиш", — деди у.
Шунингдек, Бекҳемнинг трансферини ҳам ёдга олди.
1995-йилда "Манчестер Юнайтед" ёш таркиб билан "Астон Вилла"га 1:3 ҳисобида мағлуб бўлганидан кейин "Сиз бу болалар билан ҳеч нарса юта олмайсиз", деган фикрлар билдирилган эди.
Ўша мавсумда Фергюсон жамоаси АПЛ ва Англия кубогини қўлга киритиб, дубл қайд этди.
Раян Гиггс, Гари Невилл, Пол Скоулз ва Девид Бекҳем каби ёш футболчилар жамоанинг асосий кучига айланди.
"Биз ёшларни клубга олиб кириш учун жуда қаттиқ ишлаган эдик. Бу ёш йигитлар "Манчестер Юнайтед"нинг руҳиятига айланди. Уларда катта истеъдоддан ташқари, ғалабага бўлган иштиёқ ҳам бор эди.
Бекҳемни 1995-йилда ижарага берганимда, у мен ундан қутулишга ҳаракат қиляпман, деб ўйлаган. Аслида эса ундай эмасди", — деди Фергусон.
